2008年1月20號，經過前後9日既旅行，終于翻到廣州啦！！！感覺就好似由虛幻世界翻到現實世界甘...分唔清究竟係開心多啲定係唔開心多啲...

唔開心？！其實都好正常嗻，每次去完旅行都會有少少失落感嘎啦...何況今次仲係去九寨溝添~~嗰度真係靚到令人去完又想去啊~~~

講開九寨溝...哇...嗰度真係正到暈啊！！雖然話距宜家係淡季，景色無甘靚，但其實我覺得，淡季都有淡季既玩法嗻！！最簡單，宜家嗰度可以睇雪！！其實距海子啲顔色都係甘嘎啦，無咩變過，但係喺周圍加咗雪就另有一番味道了~~呵呵...對於難得睇到雪既廣東人嚟講，真係合曬何車啦~~所以真係可以係溝入面撞到唔少廣東團嘎！！哈哈！！其次，話明係淡季，即係人少啦！！哇...真係可以人少到一個景點得一兩個人嘎~~真係想點影相就點影都得啊！！（聽講旺季一日可能有万幾二万人係溝入面，想影張靚相都要排隊啊！）同埋都係因爲人少，所以溝入面真係可以好寧靜...圍住你既就淨係得流水聲同鳥聲...真係好舒服好放鬆...感覺好似唔係喺現實世界甘...再加少少暖笠笠既太陽...哇...真係唔想走啊！！！呵呵...一講起九寨溝，真係講幾日都講唔曬啊~~~

其實今次除左九寨溝之外，我地仲去咗重慶同成都！！重慶有令人印象深刻既大足石刻...去到嗰度就會令人慨嘆古人既鬼斧神工同智慧——千幾年前古人除咗雕刻咗啲甘精美既石像之外，仲幫啲石像諗好咗以後既“生活”要點過！！勁啊！！而成都既樂山大佛同樣會令人驚嘆不已！！平時睇介紹睇得多，咩“山是一座佛，佛是一座山”...呵呵...聼落好似無咩，但係去到親眼睇到嗰陣，就真係可以感受到嗰份磅礴既氣勢了！！！雖然大佛氣勢逼人，但係其實望住大佛個樣又會覺得距好安詳，會令人好想靠近！！哈哈...係米好神奇呢！！！！

離開咗嗰啲甘正既地方就梗係會覺得唔開心啦~~但係離開令人討厭既地方就梗係開心啦！！

今次除咗係九寨溝嗰陣天氣仲幾好之外，重慶同成都日日都係陰雨面面，今朝臨走嗰陣成都仲落緊雨夾雪啊~~~又濕又凍，梗係走得快好世界啦~~所以可以翻到舒舒服服暖笠笠既廣州真係好開心嘎...哈哈！！

無論開心又好，唔開心都好，今次既旅行正式結束了！！呵呵...不過唔緊要，今次旅行既結束，就係下次旅行既開始...哈哈...要努力計劃下次既旅行嚕...^0^