琴日係10.31，10月嘅最後一日，呵呵，某程度對我地全公司既嘅人嚟講，都係“last day”。琴日公司開大會宣佈，GSC會分批同所有員工解約，然後關閉--即係話，未來幾個月之内，我會同大家一起離開公司，一起失業！！

哈哈~~都唔係第一次面對呢個詞囉，不過今次係有啲唔同嘅！！

係度做咗差唔多3年囉，目前最長嘅記錄。雖然已經開始厭倦，諗過走，不過一直都喺度俾藉口自己：等下先啦...自己咩都唔識...等下先啦...出面唔易搵工...再等下先啦...起碼都要摞埋雙糧先啦......結果，宜家都係“公司”幫我做咗決定：唔使等囉--因爲公司唔等得，要關閉嚕！！

雖然開會之前都已經收到風聲，不過親耳聼住大老細讀個公告出嚟，又係另一個感受！！唔開心梗有啲嘎啦，不過更多嘅應該係唔捨得囉！！3年啦，點會無感情啊，可以對棟樓無感情，都唔可能對身邊一大班朋友無感情啦！！無論係相識3年嘅，定係得幾個月嘅，我都好唔捨得！！同大家一齊做嘢真係好開心--有人嘅地方就會有是非，邊度都無辦法避免，呢度都一樣，但係呢度開心嘅嘢可以令我忽視存在嘅是非--好多謝大家有嘢食記得叫埋我，見到MDWS後面有好多拆單會叫我開，唔覺意跳左單會幫我開前面嘅，見到我嘅AMD會用IM叫我自己改翻，我休息會喂我啲樹飲水，同我去唱K，去旅行，去燒烤，去搵好嘢食，一起過元旦，過春季，過五一，過十一，過聖誕，過生日......所有嘢宜家諗翻轉頭都仲係好開心！！

以後會點？唔知，都未諗，我唔係做嘢好有計劃嘅人，我中意順其自然，暫時我希望開開心心做埋淨低呢段時間，然後再重頭開始囉......

宜家最擔心係唔知點同屋企人講。因爲之前提過公司會炒人，媽咪已經有啲擔心，成日提醒我要俾心機做嘢。結果宜家距嘅擔心真係變成事實，不過唔同嘅係唔係我無俾心機做野...距擔心我嗰嘢已經唔少，宜家真係唔知點開口好......

現實已經無法改變...甘米接受現實囉...相信呢個只係人生嘅小小轉折點...!!

GOOD LUCK CHERISH！！^0^